話說阿水早係上上季SPAL護級成功後，阿水就已經決定咗跟住落嚟嘅一季要去Ferrara睇SPAL-Milan，噉啱抽簽撞正賽季最後一場就係米蘭作客SPAL，仲要哥個週末跟住個星期一係bank holiday，簡真係天助我也，所以阿水諗都無諗，早係十一月就買定機票哥個週末飛去博洛尼亞準備睇波。 今次係阿水第一次嚟博洛尼亞，呢個城市不單止美食聞名於世，而且又充滿歷史名勝古跡，所以心入面可以講係非常興奮。 阿水哥日係星期五下午到埗嘅，由博洛尼亞機場出市區其實一啲都唔難，大約四十分鐘就出到博洛尼亞火車站，而且係上車的地方就有售票機，唔使周圍搵。不過如果你係由博洛尼亞火車站搭出去機場，噉就要係火車站內的商店買巴士飛出機場喇（車上無得買飛）。 到咗火車站後第一件事就係去hostel check-in，然後就趁天未全黑馬上趕上市中心行翻個圈。歐洲的夏日日長夜短，所以會有一兩個鐘頭嘅時間個天係深藍色嘅，配上橙紅色的街燈，影出嚟嘅相特別有一番風味。

博洛尼亞的暱稱叫作「紅城」，因為城內大部份建築是以紅磚建成（另一原因是因為該城傳統上政治偏左），所以在城中穿梭時就會覺得自己回到了過去，是一種很獨特的感受。 當晚嘅天氣暖得來帶點清涼，最適合坐係路邊的露天餐廳飲杯美酒，享受夏日時光。 不過始終係第一次嚟博洛尼亞，所以係Piazza Maggiore行咗一個圈就翻咗去hostel休息。 休息一晚後，迎來的是博洛尼亞清爽的初夏週末。 記得早在一年多前，阿水的一位意人朋友已經問過阿水有否到訪過博洛尼亞，認為阿水我一定會喜歡上這個地方，而事實上，博洛尼亞這個可愛的城市確實難以讓人不愛上。 城內的建築各有特色，放在一起並不讓人感到怪異，相反，反而引起了遊客想要發掘珍寶之心。

這是一座位於Via della Indipendenza 44的劇院，不走過對面馬路也很難發現門面之華麗。而劇院對面正放着意大利獨一英雄Garibaldi的雕像。

博洛尼亞除咗以「紅城」出名外，當地的騎樓景觀亦都係全歐知名嘅，平時行街唔使驚日曬雨淋。 不過電線隨天吊、南歐風格的外牆確實令阿水憶起了遠在東方的老家澳門，心情實在有點復雜（哈哈）。

又是一座隨意閒逛時發現到的美麗建築，名字是Palazzo Cassa Risparmio，位於Via Farini 22，是當地一間銀行的總部。 灰白色的主體配上華麗的裝飾，看起來十分可愛，就像少女夏日的美裙。 來到一個新的地方，當然要了解當地的歷史。 所以阿水亦抽了少許時間參觀了位於Palazzo Pepoli Vecchio（Via Castiglione 8）的博洛尼亞歷史博物館。 館內的藏品不多，但勝在在各方面都有詳細介紹，令訪客獲益良多。雖然audio guide有英語提供，不過許多物品都缺乏英文介紹牌，確實是一個遺憾。

這座博物館由石器時代開始講述博洛尼亞的歷史，如果你是一個中世紀或文藝復興時期歷史的愛好者，這個博物館能夠讓你更了解當時貴族生活對博洛尼亞社區面貌的影響，許多建設到咗以家依然能夠在市中心找到。 如果你有幸來到博洛尼亞又想不到應該拜訪甚麼地方，來博物館走一圈能夠令你有所啟發。 有興趣的朋友可以參考Bologna Welcome的網站： https://www.bolognawelcome.com/en/home/discover/places/culture-and-history/museums-and-art-galleries/palazzo-pepoli-museo-della-storia-di-bologna/ 票價（2019）： 成人 – 10 歐 優惠票（學生、70歲以上長者或殘障人士）- 8 歐 五歲以下兒童免費 官網：https://genusbononiae.it/en/palazzi/palazzo-pepoli/ 博物館內有一個展區有講到中世紀的博洛尼亞，而中世紀博洛尼亞的其中一個地標就係高塔群喇。據聞當時的貴族們為了展示自己的力量，會在城中建起高塔，後來，由於當時的建築技巧有效，不少高塔不是倒塌，就是基於安全考慮而被拆，能夠保存下的高塔不多，其中最著名的就是博洛尼亞雙塔。 這兩座塔距離博物館只有十分鐘左右的路程，既然一場來到，當然要去欣賞一下啦！

以今時今日的建築水平來說，兩座高塔雖不至高聳入雲，但從下望上去確實能感受到其雄偉之處，也令人更於古人之智慧及實力。 由於今次旅行有一突然安排的行程，所以無法仔細參觀兩座高塔，但其實官網是有出售登塔的門票，價錢亦只是5 歐（成人）或3 歐（優惠票），所以有時間的朋友定必要登塔欣賞博洛尼亞的美景。 係行去雙塔的途中，阿水被一間餐廳的窗櫥所吸引，於是沒有多想就決定入去一嚐當地風味。

其實當時並不是食飯時間，但店內已經坐滿了人， 驟眼睇都係本地人多。 博洛尼亞作為美食之都，就噉睇真係唔知食咩好。 本來入嚟係想食Tortellini，但由於款式實在太多，所以阿水最後都係決定選擇最基本的肉醬意粉。

阿水本人並非肉醬意粉迷，所以難以作出比較，不過新鮮意粉的口感的確是比較不同，另外主菜附送麵包Tigelle一份，呢種麵包雖然口感偏硬，但係配上食完主菜剩下的醬汁，其實有一種越食越過癮的感覺。 （順帶一提其實Tigelle起源於Modena，不過係市內都很常見，連機場都得賣） 呢間餐廳似乎係城內都有一定的名氣，有興趣的朋友可以考慮下。以下附上地址及官網： 地址： Sfoglia Rina Via Castiglione, 5/b, 40124 Bologna BO, Italy 網址： https://www.sfogliarina.it/en/ 講咗噉耐，又要講翻阿水當日的重頭戲，就係去Stadio Renato Dall’Ara睇波喇。 其實今次真係可以講係機緣巧合，事關阿水今次嚟嘅目的只為去Ferrara睇米蘭，點知噉啱撞正星期六晚上演博洛尼亞對拿玻里，既然機會難得，就梗係買飛入場啦。 同好多城市唔同，博洛尼亞都可以講起係意大利的大球會之一（至少球迷數目同歷史方面都唔算係咩細球會），而且該市又係旅遊城市之一，偏偏市中心係無球會專門店架！要去就只有去球場。 不過好彩位於Piazza Maggiore的遊客中心係有出售波飛嘅，所以想要買飛嘅朋友可以觀光的同時係市中心買定飛。 Stadio Renato Dall’Ara距離市中心並唔近，要去的話就要搭巴士，而阿水就係係火車站前搭21號出去球場嘅。好彩巴士上有售票機，所以唔使提早買定車飛，直接上車再買就得。但如果你真係想提早買定車飛的話，火車站內商場賣飛，又或者街上賣煙的店舖都會有巴士飛賣。 不過，要留意翻嘅係，由於球場係正馬路隔離，中間並無緩衝區畀球迷入場前聚腳，所以開波前球場外的馬路係會封咗，只供行人使用，所以搭巴士的話需要提早一個站落車，因為架車要兜路行。呢啲時候只有跟住其他人落車再行過去就OK。

Stadio Renato Dall’Ara建於1925年，1990年的世界盃亦都係呢度踢過，係當地意甲球會博洛尼亞的主球場。 呢座球場的紅塔以同迴廊都反映咗博洛尼亞的建築風格，而場內的紅塔更可以講係當地的地標之一。 其實唔講未必知，博洛尼亞最受歡迎同出名嘅運動係籃球，但足球作為深受全意人民喜愛的運動，係呢個「籃球之城」都係極受歡迎嘅。 由於球場位於市外，所以附近沒有許多餐廳可供選擇，如果去睇波的朋友要留意翻，最好食飽先出發。

眾所周知，意大利的球場大部份時間都唔會坐滿，呢場博洛尼亞對拿玻里嘅賽事雖然講就話無關痛癢（因為賽事唔會影響降班或者歐戰席位），但始終拿玻里作為意甲強者，而且呢場波又係球季最後一場，阿水實在對該場比賽嘅入場率之低感到驚訝。不過現實點來說，看得出Ultras都已經坐滿人，所以其實不算失禮。 阿水坐的位置是Curva S. Luca，係正作客區隔離，所以都可以見到呢一區其實都mix埋咗好多拿玻里同博洛尼亞的球迷。不過坐得呢啲地方都唔會係死忠，再加上呢場比賽無關痛癢，所以其實氣氛都好融洽，雙方球迷都有講有笑。

對於拿玻里嚟講，踢呢場波可以講係例行公事，因為第二名個位都已經肯定咗，踢唔踢都係噉。相反，博洛尼亞呢一季歷盡低谷，仲要差啲降埋班，所以能夠係最後一場主場打贏拿玻里相信可以振奮士氣，令球迷重拾對愛隊的信心。 呢場比賽其中一個highlight就係Simone Verdi回歸博洛尼亞。Simone上季盡晒人情去到季尾先離開博洛尼加盟拿玻里，所以翻到嚟後主場球迷都有呼叫佢個名。而Simone都可以叫做「還人情」射嚟射去都射唔入，去到中途就畀安帥換咗出去，而主場球迷都有站立鼓掌致敬。 最後博洛尼亞以3:2的成績收季，不過博洛尼亞的主帥米赫洛域可以講係一季貨色，下季可否繼續創造奇蹟，確實值得球迷留意。 最後場波完咗之後阿水就搭巴士翻翻去市區，而呢個時候就發生咗一件小插曲。阿水作為奉公守法嘅人，一上到巴士就入錢買車飛，點知入完錢先發現原來部機壞咗，唔使飛都可以搭，只能講下次買飛前要留意清楚喇。 總括嚟講，博洛尼亞真係一個值得一去的城市，不管你係鐘意食、玩，定係體育，相信博洛尼亞總有一樣嘢滿足到你的興趣。

其他意大利遊記：

[2019/08/23-08/26]威尼斯、烏甸尼、第里雅斯特四日三夜遊遊記 [2019/05/26 + 2019/06/15] 費拉拉(Ferrara)一日遊遊記 [2019/03/17]第一次於聖西路南看台觀賽 – 米蘭vs國際 (2:3) [2018/11/18] 貝加莫Bergamo半日遊 [2018/02/18] 米蘭vs森多利亞 (1:0)

如果你喜歡阿水的文章的話，歡迎關注阿水的social media和阿水交流哦：

Facebook Page: https://www.facebook.com/watersnotebook Twitter: https://twitter.com/water2217 Instagram: https://www.instagram.com/watersnotebook/ Plurk: https://www.plurk.com/water2217