2017-09-17 @San Siro MILAN 1:0 SAMPDORIA

話說今次原來係阿水第一次一個球季內去聖西路睇咗兩次米蘭，
之前通常都係一季睇一次。
上次睇哥時係九月米蘭主場對烏甸尼斯，
卡連歷梅開二度，
但係係過去嘅半季實在係發生咗大多事，
所以今次再去聖西路，
感覺真係好唔同。

其實今次嚟米蘭城，
主要只係想探吓朋友，
見到男神仲有機會坐佢架車阿水已經好感動😂😂😂
跟住就係探咗以前倫敦米蘭球迷會一齊睇波嘅大衛仔
再同米蘭歷史大師Luigi（下稱L大師）一齊食餐飯，
真係好開心

但最開心嘅當然唔止呢啲啦

話說大師佢知我嚟睇米蘭又未買飛，
就決定利用佢嘅人際網絡攞到兩張記者飛！！
所以阿水由原本打算買飛坐橙區變咗做坐紅區記者位！
入場前，L大師佢介紹咗米蘭位Press Officer N先生畀我識
N先生知我做緊香港意甲媒體嘢後，
特登叫我寫多啲關於米蘭嘅文章
為咗報答N先生嘅免費飛，
阿水會努力的🙏🏻🙏🏻🙏🏻

坐記者區感覺好特別。
突然覺得自己都變咗做記者噉😂😂😂
除咗睇波睇得好清楚外，
仲有就係睇到其他記者係度做緊咩（偷師中….）
然後坐係阿水前面嘅就係森多利亞記者，
感覺其實好特別😂😂😂
開波前有位負責米蘭微博嘅中國同志搵我傾偈，
佢以為我係同行，
點知知道咗我唔係後就已經唔想同我傾😂😂😂
不過佢都好有禮貌問我攞微信，
但我同佢講我無，
所以end of the story 😂😂😂

 

場波其實真係幾精彩，
兩邊都互有攻勢
多謝Jack開波13分鐘就入咗球，
亦好可惜RR球十二碼唔入同埋邦老師粒入球被判越位，
但Anyway，贏波就好
不過我諗成場波印象最深刻應該係A施華成個人訓低用塊面傳畀Hakan
希望A施華可以快啲係意甲開齋啦
另一方面，森多利亞啲球迷都好大聲，
唱「Milan Milan Vaffanc*l*」唱到成個球場都聽到😂😂😂
不過衰在現場好鬼凍
凍到我係噉震

 

 

完咗場波後，
L大師帶咗我去記者區下半層攞啲記者唔要嘅賽事報告，
雖然睇唔明，但睇得出份報告好專業😂😂😂
落去途中見到原來聖西路仲有電視用緊映像管電視😂😂😂😂
到底以家咩年代😂😂😂😂
意甲到底有幾窮😂😂😂😂😂

跟住L大師亦帶咗我去貴賓席行咗一個圈，
然後再參觀咗新聞發佈室
由於我地都係無牌記者，所以無辦法久留
不過見到好多專業記者做緊嘢，
搞到阿水都好仰慕
但同時原來新聞發佈室部液晶電視上面啲雪花仲多過睇粵語殘片
到底聖西路係未真係噉窮😂😂😂😂😂😂
呢啲嘢發生係英超應該畀人笑死

參觀咗大半個記者區後，
終於來到當晚嘅戲肉，
參觀Mix Zone！！

一入到去打開度門，
就見到A施華！！！！
多謝L大師的朋友G大師馬上幫阿水同佢影相，
身為葡國人的阿水好感動😭😭😭
然後見到比基利亞、薩巴達同蘇素，
不過佢地都好直行直過無停低…
當阿水分神搞緊手機時，
古東尼山現！！！
OMG
係呢期最紅嘅古仔真人呀！！
當全世界都捉住佢影相時，
阿水因為實在太high成個人咩都諗唔到，
所以只好好怕醜地問佢攞咗個簽名。
哥時實在係太興奮喇，
真係成個腦空白一遍，
只能好生硬地用意文對古仔講「Abito a Londra（我住係倫敦）」，
古仔聽到後，擺低支筆，叫咗聲「Ah」，
然後就望住阿水回咗一個笑容！
Mamma mia!!
真係一個笑容殺死水😖😖😖
阿水以前都唔知「Charming」點解，
但見到古仔個笑容後我終於明白「Charming」原來係噉解😍😍😍
古仔笑起上嚟真係好charm
迷妹已死勿找
古仔走咗後，
阿水亦都成功地同阿Jack以及Abate集郵
而大師G亦幫我叫停咗當拿仔同阿水影咗張相
去到最後，
隊長邦老師做完訪問，阿水亦都成功地同邦老師自拍咗一張
好開心

成晚都實在係太神奇太興奮，
結果我同L大師miss咗最後班地鐵😂😂😂
最後要麻煩L大師特登車我翻Hostel，
今次真係要多謝L大師🙏🏻🙏🏻🙏🏻
而L大師亦都只係叫阿水寫多啲好文章😭😭😭
實在太好人了！！！
好感激生命中遇到的每一位紅黑朋友
阿水會繼續努力的！

 

舊文重溫：

[2017/09/17]米蘭 vs 烏甸尼斯 (2:0)

諾丁漢 – AC米蘭朝聖之旅 (2017/10-22 & 10-23)

意大利最偉大的球員 – 基奧斯比．梅亞沙