人生就係為咗追星 – 利物浦傳奇隊vs米蘭光榮隊(3:2)

【人生就係為咗追星利物浦傳奇隊vs米蘭光榮隊(3:2)】

話說早係今年年初利物浦公佈將會係國際賽週搞球星隊慈善賽時,阿水就已經決定咗一定要去。不過Milan Club London哥邊又有啲唔知想點噉,最後去到比賽前一個月先定咗調,我地組團一齊去利物浦,再安排睇吓有無機會同球星見面。

利物浦博物館

阿水本身其實係披頭四嘅粉絲,都嚟過利物浦好幾次。可惜自從披頭四個雕像擺咗係海傍後就一直無抽時間翻嚟呢個美麗嘅城市,所以就決定提早一晚嚟定利物浦hea吓。

因為約定見面嘅時間係中午12點,所以阿水晨早就出咗去搵披頭四嘅雕像影相,順便去利物浦博物館行個圈。阿水作為歷史學生,一直都好鐘意利物浦博物館,因為呢個博物館嘅內容比較著重於「人」,而唔係「事件」或者「名人」,所以每次嚟到都覺得自己讀歷史係一個正確嘅選擇(雖然以家已經無再點做同歷史有關嘅嘢)。

球星合照時刻

去到十一點幾左右,阿水就趕到米蘭球員住嘅酒店,門口已經佈滿晒利記嘅球迷同埋啲人見人憎嘅簽名黨。

去到十一點半左右,阿水啲朋友終於嚟到,而其中一位幹事M就聯絡米蘭官方睇吓可否安排入去酒店,企係門口等人。就係M君聯絡緊人嘅時候,奧度就一丁友出咗嚟,睇個樣似係想買啲嘢噉,我一見到奧度出嚟,就馬上指住佢尖叫啦,點知成班友仔未訓醒,仲問我叫咩,到後尾奧度係我地後面行過,M君先一言驚醒夢中人話:「咦!係Massimo Oddo喎!」哥剎那我真係覺得我地成班友7到喊

噉米蘭哥邊位工作人員當然話無問題啦,於是就畀我地一行人企係Reception等,點知呢個時候利物浦嘅工作人員就走出嚟話唔睇,因為對利物浦球迷唔公平,當時我地都唔知原來有幾位利物浦嘅球員都住咗係同一間酒店度,只好死死氣噉出翻去啦。就係呢一個時候,安察洛堤拖住個篋入咗嚟,望住我地成班人企係reception度唔知做嘜,只有我朋友T夠醒目,即刻伸手同佢握手,然後76就馬上走咗入電梯,我地成班人就只好出翻去企。不過好在,米蘭同利物浦嘅人都答應我地,如果有球員進出,佢地會叫佢地過嚟同我地簽名。

當我地係出面睇緊嘅時候,有人同我地講:「咦,恩沙基係度食緊早餐喎!」作為大恩粉絲嘅阿水梗係即刻走埋去望啦,於是乎就見到大恩同佢女朋友一齊食早餐,我就同班人講:「喂,大恩同佢女朋友食緊早餐喎,唔好打擾佢地啦。」班人就問我你點知佢係大恩女朋友,阿水心諗,做得迷妹唔係連呢啲花邊新聞都唔知嘛

之後大恩同女朋友食完早餐離開,我地呢班球迷都有係窗外同佢揮手,阿水當然亦都出盡全力拎住支London旗同大恩揮手啦,噉大恩都好有禮貌噉同我地揮吓手,舉起隻姆指示意嘅

就係呢個時候奧度出完去買完嘢,馬上就畀米蘭啲工作人員截住咗叫佢地過去同我地影相。阿水見到就即刻同朋友T講:「嘩,成面事好尷尬,如果我係奧度一定會話『我唔想同呢班人影相』,頭先我地成班人無認得佢叫佢影相。」

不過,奧度人好好嘅,當然無阿水講噉小氣啦,於是就話好呀,帶住自己個私人助理走咗埋嚟同我地影相,又簽埋名,仲話要將將相擺上instagram

噉同奧度影完,N先生就叫咗米蘭吉祥物馬沙路出嚟同我地影相,簽名,阿水朋友D早係1994年已經支持米蘭,而噉啱佢個名又係叫Daniel,咪即刻叫我幫佢地影相啦。不過就係呢個時候,啲好黑人憎嘅簽名黨就衝晒出嚟,阻住我地同馬沙路簽名同影相,哥一刻我地成班人都好嬲,因為班簽名黨攞嚟簽名嚟只係放上E-Bay賣,但我地呢啲真球迷等咗十幾廿年都只係等呢一刻,所以真係好嬲。

跟住艾比亞迪出到嚟又係,咪行到嚟我地度,已經畀成班簽名黨截住,然後啲保安又欺善怕惡,剩係識叫我地唔好阻住,又唔敢同啲簽名黨嘈。好彩艾比神都算留得耐,簽晒名影晒相先走。但我地已經有人唔鋸,開始同保安嘈。

過咗無耐,架隊巴嚟到,噉利物浦哥邊見我地嘈足噉耐,終於畀我地企係欄杆前同班球星攞簽名。噉N先生就話會叫啲球星過嚟同我地影相,所以幹事M就叫我地唔好亂噉嚟,結果第一個出嚟嘅就係迪達,啲人一見到迪達梗係痴咗線,開始亂七八糟,而阿水夾係人群中間完全唔知發生緊咩事。

之後N先生又叫咗岩布仙尼過嚟,而其他唔少球星已經開始上車,而阿水只能目送住派路同大恩上車。話說岩布過到嚟,成個人都好chill,就噉企埋牆角玩手機,唔少人都唔知佢行咗埋嚟,當朋友T同緊岩布影相哥陣,卡卡就出咗嚟喇,N先生一見到喎,就當然叫佢過嚟同我地影相啦。班人一見到卡卡就更加癲,而阿水我今朝成日已經同佢地講一見到卡卡要唱卡卡首歌,我見無人帶頭,就只好開始帶頭「Siam’ venuti fin qua Siam’ venuti fin qua!」,啲人一聽到我帶頭就開始跟住唱。

點知係呢個時候,因為無人理岩布,所以佢就企正我面前,中間一個人都無,睇住我帶頭唱「Siam’ venti fin qua!」,佢唔知係咪覺得好新奇定啲嘜,一望到我望住佢就開始係度笑喇,阿水呢一刻真係好想化身做鴕鳥匿埋,真係醜死怪

不過尷尬還尷尬,都要頂硬上,馬上走過去問岩布可唔可以簽名,佢就一手拎住手機一手拎住支筆,好輕鬆噉係件衫度簽咗個名,然而我再問佢可唔可以自拍,佢話OK,但佢仲係一手拎住個電話唔放,我企到埋佢隔望,望住佢部手機,佢都仲好hea噉開住個whatsapp,打算係個叫「Liverpool」嘅whatsapp group入面打字,直到佢留意到我我都望住佢部手機,佢先放低,同我自拍。

到自拍完後,卡卡已經走咗,而岩布見畀其他人叫住亦只好走人。

哥剎那阿水心諗,卡卡就係我唔夠一米嘅範圍,我竟然無同佢影到相,而係走咗去搵生日快樂集郵

我噉講唔係睇低岩布,但因為佢全程都好chill噉企咗係人群堆入面,根本就唔趕住走,但卡卡呢,卡卡同兩個人影完自拍後走咗,哥剎那阿水真係覺得自己好L7

要明白,岩布同其他人都係base係意大利,見面嘅機會總比base係美洲嘅卡卡多。而卡卡佢,就企咗係我面前,我就噉由得佢走咗,我就噉由得金球獎得主嘅卡卡走咗!

XXXXXXX,成件事真係又傷心,又7

不過最黑人憎嘅係,我地呢班米蘭球迷,基本上無咩機會同米蘭球星攞簽名,結果班神憎鬼厭嘅簽名黨左攝右攝攞咗一大堆我地都攞唔到嘅簽名,結果全日嘅心情就畀呢啲人搞禍咗

Anfield

Anyway,簽唔簽到名,集唔集到郵,都係時候出發去晏菲路睇波。出到嚟晏菲路,阿水身邊嘅意大利球迷都覺得個球場好細,又唔似得聖西路噉有好多空間畀人會面、集結噉。不過英格蘭唔同意大利,因為意大利好多球場都係政府、國家嘅,所以都會比較大或者預留多啲空間係附近,而且點講聖西路又唔係只係for米蘭,仲有國米同國家隊都會用,所以大啲都好合理嘅。

話說今次場波啲飛,係朋友T幫手買嘅,所以其實都坐得離客區幾遠吓,於是乎我地就偷偷地兜路行到去客區再搵吉位坐。本來臨開賽前我地都幾驚畀人趕翻去嘅,不過好彩反正有位,而且又只係charity game,所以就無嘜點check,就噉畀我地坐係度。

本身我地都唔expect有好多意大利球迷進場,點知真係有南看台嘅人組團嚟睇。噉意大利同米蘭嘅睇波文化其實都好唔同,因為英格蘭對人群管制好嚴,所以場波都唔畀人全程企起身睇,而且班Steward一見到成班作客嘅人又唱歌又企起身,就好緊張,馬上叫咗一大堆人圍住。阿水講真呢一刻都覺得又有啲唔舒服,始終我地嘜都無做,只係為愛隊坐吓歌姐,使唔使噉都咁大反應?不過當然人地都係打份工姐,又唔可以怪人地。

場波踢成點,相信網絡上都有好多途徑可以睇翻就唔再多講,不過阿水就想分享吓一啲關於派路嘅嘢。

噉話說派路就係今季季前正式宣佈掛靴啦,所以今次都係派路第一次代表米蘭光榮隊出賽。唔係意大利嘅米蘭球迷大多都對派路轉會去祖雲達斯唔會有太多嘅感想,但係意大利好多米蘭死忠都好憎派路。唔知嘅人會以為米蘭球迷小氣,人地轉會姐,使嘜反晒面,但其實派路係踢祖記嘅時候試過好多次公開地講過米蘭壞話,所以啲球迷先噉憎佢。不過點都好,球迷個人感想係一會事,正所謂「愛恨之間只差一線」,啲人噉憎派路,都係因為以前愛得佢太深姐,而且呢啲慈善賽場合,亦都無謂繼續計較。結果派路入咗球罰球後,成個作客區靜晒,因為班南看台唔知應該畀啲咩反應,只好開始係度唱「Juventino pezzo di merd*

集郵成功

最後比賽以3:2嘅賽果閉幕,作為一個平凡嘅國際賽週週末,噉樣嘅一場波亦都可以講係lots of fun嘅,不過最開心都係可以同一大班人一齊聚吓頭,吹吓水,追吓星,呢一啲時光真係畢生難忘。

發表迴響

在下方填入你的資料或按右方圖示以社群網站登入:

WordPress.com 標誌

您的留言將使用 WordPress.com 帳號。 登出 /  變更 )

Google photo

您的留言將使用 Google 帳號。 登出 /  變更 )

Twitter picture

您的留言將使用 Twitter 帳號。 登出 /  變更 )

Facebook照片

您的留言將使用 Facebook 帳號。 登出 /  變更 )

連結到 %s