話說阿水自從成為咗社會人士後，就無咩機會去睇現場波。

對上一次睇米蘭已經係已經係上年十一月去西維爾睇歐霸嘅事，所以去到一月嘅時候心入面已經好想翻去聖西路睇波，再加上係朋友嘅慫恿下就決定咗一齊去睇打吡。

噉話說係呢場比賽之前，米蘭的戰況都唔差，再加上隔離街嘅大國際近況麻麻，所以阿水身邊唔少朋友都對呢場比賽充滿期待。而阿水呢，雖然講係有寄望，不過點講國米最近嘅情況太差，所以心入面就覺得藍黑差極都要係打吡挽回翻啲面子，所以總覺得米蘭係呢場打吡戰中可以講係毫無優勢，而且過去的一兩個月工作都好忙，事實上心入面已經攰到唔想再理比賽結果，只係想好好地係米蘭聖西路同比賽一齊享受吓共處嘅時光。

Anyway，因為阿水去到星期六晚都要翻工，結果只能趕係朝早機到米蘭，然後狗衝去酒店check-in，訓覺再起身同友人匯合。

 

 

當日未出到米蘭市中心，由倫敦等上機遇到幾位紅黑，再係貝加莫機場成架穿梭巴都係米蘭球迷，心入面己經開始慢慢興奮上嚟。噉我同朋友就約咗係米蘭大教堂前一齊集合嘅，噉我地其中一位成員朋友A就係Milan Club Dublin的成員，所以都慣咗同Dublin班人一齊活動，飲吓酒吹吓水，所以就算阿水未去過都柏林，都認識Milan Club Dublin嘅幾位人物。

噉本身米蘭大教堂就係米蘭市的地標，好多人搞活動聚頭都會約係大教堂前嘅廣場，所以好多人見到我地唔係意大利嚟就好好奇係噉走埋嚟問同影相。最搞笑係有對老夫婦捉住我朋友J係噉問長問短，最後又話要影相，一影完相就自爆其實二人係支持祖雲達斯，真係搞笑🤣🤣🤣

但最抵死嘅就係朋友A同J喇，噉話說佢地兩個係死黨嚟嘅，跟住見到有個好索嘅女人係大教堂前影相，咪走埋去攝鏡諗住識人，點知畀人一嘢推開咗🤣🤣🤣 因為人地係做fashion influencer根本唔受溝仲厭佢地兩個阻住晒🤣🤣🤣 我同其他幾個花生友真係全程睇住超搞笑🤣🤣🤣

當時嘅氣氛可以講係幾輕鬆，廣場上基本都係紅黑嘅人，大家都好causal地喝吓啤酒吹吓水噉，間唔中都有唔少人問我地可唔可以一齊影張相，好似一家人噉。後來到咗差唔多時候，我地就一行人一齊出發去聖西路喇。

 

噉作為南看台嘅一份子，當然出發前都要有個地方聚吓頭，見吓朋友，搞吓氣氛先架啦。係聖西路對出無幾遠就有一個好細嘅做Piazza Axum的空地，噉南看台呢通常會係呢度聚頭嘅。

噉講得係南看台，放吓煙花、煙霧彈呢啲已經係家常便飯，不過比較煩就係隨處掟炮仗，嘈係一回事，但dum出去又唔叫聲，結果成日嚇翻自己友轉頭….

可能有啲讀者睇到呢度就覺得：「嘩，嘜班人成班暴徒噉架！」但其實大家噉做就好似同朋友過節噉，一大班人一齊飲吓酒，唱吓歌，放吓煙花，其實係好普通嘅事。成個晏晝有唔少國米嘅球迷經過，大家都各行各路，河水不犯井水，相安無事。

不過當然，畀着係我都會怯嘅，不過好彩識得人，有人帶，所以都無話有咩好驚，萬事小心啲就OK。

同各路朋友一齊飲完、吹完水後，阿水就同朋友一齊進場喇。

其實今次米蘭為咗打吡都落咗好多功夫。由比賽前一晚起，米蘭就已經係聖西路打晒燈。仲用埋hashtag #JoinTheFlame 嚟吸引人注意添。

不過阿水就覺得其實聖西路平時就已經好正，唔需要呢啲門面樣嚟搞氣氛，但當然係呢個咩都講marketing嘅年代，有搞係好過唔搞嘅…

話說阿水係聖西路都睇過唔少波，基本上，藍色、橙色、綠色同紅色位都坐過，連記者席都試過添。不過同南看台一齊睇波就真係第一次。

記得阿水幾年前試過係Casa Milan買飛指住要坐南看台，結果人地唔肯賣，叫我坐第二度。當然只係覺得點解唔肯賣，以家諗翻，其實坐得南看台嘅都係買開季票嘅，無位賣都好正常。

今次張飛其實都係靠阿水一位有季票嘅朋友買落嘅。聽講季票人士可以一人另外買四張飛，而且價錢亦都比平時公開發售平（阿水張飛只係55歐左右，同區公開發售價係90歐左右），所以真係不得不說出門真係要靠朋友。

唔知係唔係因為打吡嘅關係，所以場內都見到好多人都好緊張。噉阿水一入到場第一時間就要去洗手間，去完洗手間後出到嚟啲人同我講話唔可以過哥邊坐，但我地朋友都已經係晒度，我梗係唔理南看台班人照樣走過去啦，不過都留意到南看台話事班人神色凝重，非常緊張。至於阿水呢，基本上就係抱住嚟睇風景嘅心態，所以都唔見得話特別緊張或者啲嘜，

雖然講就話第一次係聖西路南看台睇波，但其實上次去西維爾睇貝迪斯時已經見識過南看台狂熱球迷嘅威力，所以今次嚟到其實都唔會覺得驚或者奇怪，而且今次同上次一樣都係同一大班朋友睇波，心入面都唔會話覺得有咩好膽心。

話說唔少港澳人可能會覺得：「嘩！同南看台一齊睇波喎！一定好正啦！」氣氛嚟講係嘅，但事實上阿水就覺得如果唔識人其實係南看台睇波又唔見得特別厲害或者有趣。

點解噉講？因為場波有九成時間你都係睇噉唔到踢緊啲嘜架！

今次阿水多得朋友幫手買飛同霸位，所以都叫做企係一個唔錯嘅位置，第三層第三排中間位，於是乎，基本上比賽大部份時間都係咩都睇唔到，只睇到人放煙霧彈，同一堆煙，再加上呢個位係龍門後面第三層，每次當啲人攻到係我地下面個龍門前，都要企高伸個頭向下望先見到人開角球，所以阿水真心覺得如果你係第一次嚟，又唔識人，最好都係乖乖地買紅區或者橙區嘅位，至少可以專心地欣賞整場賽事，影翻幾幅靚相。

當然，同南看台一齊睇波都有唔少有趣嘅故事。

例如係完半場前，南看台份子突然係正我個frd嘅後面發煙霧彈，結果嚇到我個frd成個人彈開咗，走到我後面匿埋🤣🤣🤣

仲有就係阿水每次一睇波就變咗成個人噉，於是乎一開波就會不停地用意文大嗌，同班死忠一齊高歌，連平時一齊睇開波嘅朋友都會同我講話「嘩，你都好投入喎」，不過現實係，係呢度噉嘈噉開放嘅環境，一個人大叫基本上係聽唔到自己嘅把聲嘅，所以阿水自己亦都唔知自己叫緊幾大聲，直到米蘭入咗第二球後，突然有群三九唔識七嘅米蘭球迷拍我，再同佢班死黨講：「要好似呢個中國女仔一樣叫得噉大聲」，哥剎那真係尷尬到🤣🙈

不過開心還開心，最後米蘭2:3不勝隔離街嘅大國際係有啲失望嘅。始終隊波上半場時完全唔集中，而且有好幾位球員都發揮唔到平時應有嘅表現，再加上國米呢排有啲低迷，要贏打吡嚟振奮士氣都好正常嘅。

Anyway，就算賽果不如理想，但純粹以波論波，呢場比賽的確值回票價，兩邊嘅表現不必係最top，但場波嘅過程的確係非常精彩，無一刻覺得沉悶，而呢一刻，阿水亦至能希望愛隊唔好因為輸咗打吡而氣餒，繼續以意甲前四、歐聯席位而努力。

 

雖然今次係米蘭無緣睇到米蘭贏波而回，但係好彩上天都算係待我不薄，係第二日以晴朗嘅天氣嚟招呼阿水。哥時室外氣溫大概16度，再加上太陽照射，成個人都覺得好舒服，係條街就噉著T恤牛仔褲再加件薄外套就得，成個人都馬上開心咗好多。

再加上今次阿水總算完咗一直想係米蘭大教堂前飲Aperol Sprtiz嘅心願，今次旅行都算係值得啦！

最後追加：

噉阿水因為星期二要翻工嘅關係，所以要趕星期一下午機翻倫敦。噉意大利啲機場其實都出晒名安檢差，但今次最無奈係有兩個海關見到我著住件Milan Club London嘅T恤，就係噉捉住我問長問知：

海關A：「嗨，你好呀，請問你講英文定意文？」

水：「英文會好啲。」

海關A：「OK，噉我地就係海關嚟嘅，噉樣如果你有啲咩嘢嘅話就要申報嘅。請問你身上有無多於一萬歐羅現金？」

水心諗：「X你，哪有錢？」

水：「無喎，我得40歐咋。」

海關A：「OK，噉你係邊度嚟嘅？」

海關B即刻低聲講：「咪倫敦囉，Milan Club London嘛。」

水：「倫敦囉。」

海關A：「噉你嚟意大利做咩？係倫敦又做啲咩？嚟旅行？」

海關B繼續低語：「嚟睇打吡呀。人地嚟打吡呀。」

水（開始煩）：「我係倫敦住，嚟睇波囉。」

海關B：「嗱，都話嚟睇波。」

海關A望望海關B，繼續問：「你身上真係無嘢要申報？」

水：「無呀，我得40歐同一啲卡咋。」

海關A：「呢啲卡係咩卡嚟嘅？有幾多錢係入面？」

水（真心開始覺得嬲）：「倫敦啲銀行卡囉！唔關你事！」

海關B見情況：「係囉，係囉，都無嘢啦，畀人走啦。」

然後海關B就拉住海關A走咗。

阿水真係心諗你地兩個翻工翻到悶，都唔使搵我嚟煩架…..

之後阿水第二日翻工就同個意大利女同事講起件事，同事佢嬲到爆因為佢覺得呢件事再一次說明意大利人唔識尊重女性，anyway，呢啲事阿水係意大利都已經見慣見熟，只能講聲「No Comment」。