話說早一兩個月時，歐霸抽籤米蘭就抽中對貝迪斯Real Betis。噉我地Milan Club London就決定組團去睇波，而作為N年都係自己一條友去旅行嘅阿水梗係決定join啦，所以就踏上咗呢次睇波快閃兩日一夜團喇。

其實出門哥陣已經唔多順，本來買咗National Express由Waterloo踏巴士去Stansted Airport，點知Waterloo個站維修緊，結果資訊好混亂等咗半個鐘有多都無車嚟，只好臨時叫Uber趕去Liverpool Street踏Stansted Express（結果浪費咗金錢、時間同體力）。 由於今次因為成班友一齊去，所以阿水都唔使plan啲咩，跟大團就得。

到埗後因為間AirBnB未夠鐘check in，只好係附近一間家庭式茶餐廳hea。然後發現啲嘢食超平，平到喊，半pint啤酒先1歐（雖然好難飲），而個好好食嘅西班牙乾火腿包兩歐都唔使。超正又好食！

不過由於比賽前一晚有米蘭球迷係市中心搞事畀警察拉咗，所以啲人話入到市區都唔好show有米蘭logo嘅衣著，不過因為我地成班人，再加上意文同西班牙文好似，沿途大把人已經知我地係米蘭球迷😂😂😂

去到哥時啲天氣垃圾到喊，大雨到痴線，好彩到我地出到市區時天氣已經好咗好多無點落雨。噉我地出發去球場之前，都會係一個地方同南看台嘅人會面，再一齊出發。唔知係未因為歐洲賽事唔賣酒精飲品嘅關係，定係由於場波去到當地時間成9點先開始嘅關係，所以我地成班人係間酒吧度呆咗成兩三個鐘先一齊出發，所以有啲時候阿水都心諗自己係度做緊咩😅😅

順便提翻件小事，啱啱到間酒吧時我朋友問我見到咁多南看台嘅人會唔會驚，或者覺得奇怪，我話會，唔係因為一睇就知成班人係流氓😂😂😂，而係我敢肯定呢度大把人唔識講英文而以我嘅意文水平又唔會同佢地溝通到覺得又少少唔舒服姐，而我朋友聽到我噉話就即刻笑咗出嚟😂😂😂

Betis個主場其實離市區都幾遠吓，不過我地成班人一齊行，所以感覺上無話覺得行咗好多路。到我地就嚟抵達球場時，就開始見到好多警察監察住，而我身邊幾位朋友都開始覺得好唔耐煩。而我唔少朋友都覺得今次球場安檢特別嚴，阿水因為係女仔所以好快就過咗安檢（而且又唔使點排隊），但阿水有位朋友就無端端畀警察拉埋咗一邊搜身，搞咗好耐根本咩都查唔到就只好放佢走，結點成班人唔入到場已經好燥。而據聞就係因為噉所以有一班南看台嘅人就選擇咗唔入場（可能係驚過唔到安檢），所以琴晚米蘭球迷都比較靜。

貝迪斯個球場都好一段歷史，而佢亦都係西班牙第四多座位嘅球場，我諗其中一個原因可以容納到咁多人係因為佢地最上面層看台真係好斜！！！我地算係最早一批入場，結果好多吉位，一望落去好似咩都無成個人會跌落去噉，所以阿水感到好唔舒服，後來個南看台多咗人入場fill up咗啲都好啲，就當係一次experience。

噉貝迪斯主場係開場前都有全場大合唱嘅，再加上係歐霸夜，所以都有個算係噉嘅燈光show，不過嚟得作客，當然唔會點理，全程一直boooooooo啦😅😅

其實貝迪斯係小組暫時排第一一啲都唔出奇，個人覺得米蘭今季踢波太拖泥帶水，班友仔又成日聚埋一齊唔識拉出啲空間發動攻勢，有波又好多時唔肯爆，真係睇到激鬼氣😡😡😡

哥晚阿水大概有六成時間同南看台一齊唱歌，四成時間就係度爆晒粗噉鬧班友仔（我諗我一世人真係第一次噉爛口🙈🙈🙈）。然後蘇素憑住「蘇一招」入咗球追平係開心嘅，跟住南看台就同隔離貝迪斯嘅看台一直係度鬧交，我諗除咗係因為貝迪斯真係唔易對付外，就係因為安檢單嘢令到班人特別燥….可以講今次睇波之旅真係特別難忘…

Anyway, 唱咗成晚90分鐘後，阿水真係攰到死，成班友係AirBnB附近間Kebab shop食咗個宵夜後就翻咗去訓。

由於我地成團人有好多人星期六都要翻工，所以超過一半人朝頭早就搭機翻咗去倫敦，而阿水我可以的話都想留到星期六日先走，可惜阿水一早就book咗週末去巴黎，只好搭夜晚機翻倫敦，所以就有一個朝早係西維爾hea吓。

其實都想好好用盡個朝早周圍睇睇，不過始終N年無同朋友一齊去旅行（屋企人另計啦），所以最後都係放棄咗一個人周圍去，同剩低係度嘅兩、三位球迷朋友一齊食中午飯。

噉我朋友就係TripAdvisor搵到一間評分超高嘅餐廳，間嘢就只係食tapas嘅，所以午飯時去都只係七成full，有張大枱可以坐低慢慢食。果然TripAdvisor四星幾嘅評分真係無介紹錯，啲嘢食一嚟到已經好食到喊，最後我地都order咗三轉（每次約四件tapas）！轉轉都好好食！而噉啱佢地又做緊苦艾酒promotion，我地亦都叫咗嚟飲，又係好正好好飲😍😍😍而最驚訝嘅係，十幾件tapas（麵包任添），六杯啤酒，一杯紅酒同七杯苦艾酒後，埋單都只係七十幾歐，每人唔使廿歐，係倫敦我諗埋單應該都係呢個價嘅兩三倍😅

以下係店舖地址，有興趣嘅朋友都可以嚟試吓架：
Bodeguita Romero
Calle Harinas, 10, 41001 Sevilla, Spain

阿水因為受基友所托要去西維爾（今次係足球）嘅專門店買嘢同寄明信片，所以就早走咗，係市區行咗個圈。其實西維爾都幾多嘢睇，因為佢地係大航海時期係西班牙其中一個最重要嘅港口，所以去美洲嘅船最後都會翻到西維爾，於是市內其實都有幾多豪華同有特色嘅建築。可惜阿水今次無緣慢慢睇，唯有寄望基友早日翻佢老家西維爾睇波時可以join吓佢啦😘

順便送上一啲我係西維爾影嘅相，只能講呢個城市真係好靚又好玩：

 

 

順帶一提，附圖中有一張影南看台嘅相，倫敦支旗隔離，白色箭嘴指住哥個就係阿水喇😂😂😂 因為生得矮加舉起咗條頸巾嘅關係所以你睇我唔到😂